Pwosesis pou Kiben, Ayisyen, Nikaragweyen, ak Venezyelyen

Kiyès yo Ka Konsidere pou Otorizasyon Vwayaj ki bay Alavans

Pou w kapab kalifye pou fè demann, epi pou yo finalman konsidere otorizasyon vwayaj ki bay alavans pou Etazini pou fè demann libète sou kondisyon nan kad pwosesis sa yo, benefisyè yo dwe:

• P ap viv Etazini;
• Yon moun ki soti Kiba, Ayiti, Nikaragwa, oswa Venezyela; oswa yo dwe yon manm fanmi pwòch (mari oswa madanm, patnè ki nan inyon lib, epi/oswa yon timoun ki pa marye epi ki poko gen 21 lane) k ap vwayaje avèk yon Kiben, Ayisyen, Nikaragweyen, oswa Venezyelyen ki kalifye;
• Gen yon sipòtè k ap viv Etazini ki ranpli yon Fòm I-134A nan non yo USCIS apwouve epi konfime;
• Gen yon paspò ki pa ekspire epi ki valid pou vwayaj entènasyonal;
• Fè pwòp vwayaj komèsyal yo nan yon Pò Rantre (Port of Entry, POE) nan Etazini ak nan destinasyon final yo nan Etazini;
• Pase epi reyisi kontwòl sekirite nasyonal ak sekirite piblik ki obligatwa;
• Respekte tout egzijans anplis, li gen ladan l obligasyon pou vaksinasyon ak lòt rekòmandasyon pou sante piblik; ak
• Demontre libète sou kondisyon an jistifye sou baz yon avantaj piblik enpòtan oswa rezon imanitè ki ijan, epi montre ou merite yon egzèsis favorab nan pouvwa desizyon nou.

Si yon moun gen doub nasyonalite oswa si l gen estati rezidan, oswa refijye nan yon lòt peyi li pa kalifye pou nou konsidere l pou libète sou kondisyon nan kad pwosesis sa a, sof si DHS aplike yon pwosesis libète sou kondisyon ki menm jan pou moun ki soti nan peyi sa a. Egzijans sa a p ap aplike pou manm fanmi pwòch (mari oswa madanm, patnè ki nan inyon lib, oswa yon timoun ki pa marye epi ki poko gen 21 lane) k ap vwayaje avèk yon moun ki kalifye ki soti Kiba, Ayiti, Nikaragwa, oswa Venezyela.

Anplis, yon benefisyè potansyèl pa kalifye pou otorizasyon vwayaj ki bay alavans pou Etazini ansanm ak libète sou kondisyon nan kad pwosesis sa yo si moun nan:

• Pa pase kontwòl sekirite nasyonal ak sekirite piblik la oswa yo konsidere li pa merite egzèsis favorab nan pouvwa desizyon an;
• Te depòte nan peyi Etazini nan senk ane ki pase yo oswa li te sibi yon entèdiksyon pou antre sou teritwa a ki baze sou yon òdonans pou depòtasyon yo te deja pran;
• Te rantre Etazini yon fason ki pa legal, atravè POE yo, apre dat yo te anonse pwosesis la (pou Venezyelyen, apre 19 Oktòb 2022; pou Kiben, Ayisyen, ak Nikaragweyen, apre 9 Janvye 2023), eksepte moun ki gen otorizasyon pou yon sèl depa volontè daprè INA seksyon § 240B, 8 U.S.C. § 1229c oswa anilasyon demann admisyon yo a dapre INA seksyon § 235(a)(4), 8 U.S.C. § 1225(a)(4) ki pral rete kalifye;
• Te travèse fwontyè Meksiken oswa Panameyen an yon fason ilegal apre dat yo te anonse pwosesis la (pou Venezyelyen, apre 19 Oktòb 2022; pou Kiben, Ayisyen, ak Nikaragweyen, apre 9 Janvye 2023);
• Se Kiben oswa Ayisyen epi yo te pran l nan lanmè a apre 27 Avril 2023; oswa
• Gen mwens pase 18 an epi li p ap vwayaje nan kad pwosesis sa a ak yon paran oswa yon responsab legal.

Nòt Enpòtan konsènan Paspò Venezyelyen an

Benefisyè a dwe gen yon paspò ki valid, ki poko ekspire. Pwolongasyon ki sètifye validite paspò yo sèvi pou reponn ak egzijans sa a. Si yo te pwolonje validite paspò yon benefisyè, dat ekspirasyon pwolongasyon an ta dwe reflete dat ekspirasyon paspò a. CBP pa pral otorize vwayaj si paspò oswa pwolongasyon benefisyè a ekspire.

Daprè dekrè Asanble Nasyonal la nan dat 25 jen 2024, paspò Venezyelyen yo te bay avan dat dekrè sa a rete valid pou dis (10) lane apre dat ekspirasyon ki enprime nan paspò a oswa apre dat ekspirasyon dènye ekstansyon paspò a ("prórroga"), selon dat ki pi lwen an.

Timoun ki poko gen 18 lane k ap vwayaje san paran oswa responsab legal yo pa kalifye pou otorizasyon vwayaj ki bay alavans oswa otorizasyon tanporè pou rete Ozetazini nan kad pwosesis pou Kiben, Ayisyen, Nikaragweyen ak Venezyelyen. Lè yo rive nan yon pò pou antre Ozetazini, yon timoun ki poko gen 18 lane ki pa vwayaje ak paran li oswa responsab legal li a ka transfere nan siveyans Depatman Sante ak Sèvis Sosyal la (Health and Human Services, HHS), jan lalwa egzije sa selon Lwa 2008 sou Nouvo Otorizasyon pou Pwoteksyon viktim anrapò ak Komès Moun (Trafficking Victims Protection Reauthorization Act, TVPRA). Pou plis enfòmasyon, tanpri vizite paj entènèt HHS Timoun ki pa Akonpaye yo.

Timoun ki pa vwayaje ak yon paran oswa yon responsab legal men ki vin Ozetazini pou rankontre yon paran oswa yon responsab legal ka prefere chèche otorizasyon pou rete Ozetazini gras ak pwosesis nòmal Fòm I-131 an. Nan pwosesis pou otorizasyon tanporè ki nan Fòm I-131, timoun ki poko gen 18 lane k ap vwayaje san yon paran oswa yon responsab legal ap bezwen yon otorizasyon alekri nan men tout granmoun ki gen gad legal timoun nan (li gen ladan l paran oswa responsab legal) pou vwayaje Etazini.

Prèv ki soumèt anplis ak Fòm I-131 ta dwe se:

• Konbyen tan yo fè Ozetazini; ak
• Prèv ki montre gen yon relasyon ant timoun ki poko gen 18 lane ak paran oswa responsab legal la timoun nan ap vwayaje pou al jwenn Ozetazini a (gade Etap 5, ki anba).

Si responsab legal la bay otorizasyon l alekri, moun ki fè demann lan dwe ajoute prèv responsabilite legal yon otorite nan gouvènman an bay. Anplis, aplikasyon an dwe gen ladan l yon deklarasyon sou relasyon timoun nan genyen ak moun k ap depoze Fòm I-131 a, epi si moun nan gen entansyon pran swen epi pran gad timoun nan Ozetazini, oswa reyini timoun nan avèk paran oswa responsab legal li gen Ozetazini. Pou jwenn plis enfòmasyon, tanpri ale sou paj Gid sou Prèv pou Kèk Kalite Liberasyon sou Kondisyon pou Rezon Imanitè oswa Avantaj Piblik Enpòtan, li gen enfòmasyon sou kondisyon pou fè demann liberasyon sou kondisyon pou timoun.

Ou ka fè demann yon egzanpsyon frè lè w ap soumèt Fòm I-131 pou timoun jan li dekri nan paragraf ki anwo a. Pou jwenn plis enfòmasyon sou fason pou fè demann yon egzanpsyon frè, tanpri ale sou sit entènèt Fòm I-912, Demann pou Egzanpsyon Frè.

Chimen pou Timoun ki poko gen 18 Lane ki Pa Ozetazini ki Gen Paran oswa Responsab Legal Ozetazini

Si paran oswa responsab legal timoun nan gen yon estati legal Ozetazini, se yon moun ki gen yon otorizasyon pou rete Etazini Tanporèman (tankou Kiben, Ayisyen, Nikaragweyen ak Venezyelyen ki gen otorizasyon pou rete Ozetazini nan kad pwosesis libète sou kondisyon an), oswa se yon benefisyè yon aksyon difere oswa ou pa t benefisye yon entèvansyon ki te anpeche yo depòte ou (Deferred Enforced Departure, DED); epi paran oswa responsab legal la gen dokiman oswa otorizasyon pou re-antre Ozetazini apre yon vwayaj, yo ka kalifye pou ale chèche timoun yo an pou vin Ozetazini ak li. Timoun nan dwe kalifye pou otorizasyon tanporè pou rantre Ozetazini nan kad pwosesis pou Kiben, Ayisyen, Nikaragweyen oswa Venezyelyen.

Pou yon timoun ki gen mwens pase 18 lane kapab jwenn otorizasyon tanporè pou rete Ozetazini nan kad pwosesis sa yo ki pou Kiben, Ayisyen, Nikaragweyen oswa Venezyelyen, yon sipòtè dwe ranpli Fòm I-134A la sou non timoun nan ki ap chèche reyini ak paran l oswa responsab legal li (yo) ki Ozetazini. Paran oswa responsab legal timoun nan kapab ranpli Fòm I-134A nan non timoun nan si paran oswa responsab legal la gen yon estati legal Ozetazini, se yon moun ki gen yon otorizasyon pou rete Etazini Tanporèman oswa se yon benefisyè yon aksyon difere oswa ou pa t benefisye yon entèvansyon ki te anpeche yo depòte ou (Deferred Enforced Departure, DED). Sepandan, moun ki sipòtè ki Ozetazini a pa bezwen gen yon relasyon ak benefisyè li ranpli Fòm I-134A la pou li a.

Apre USCIS konfime Fòm I-134A la, sipòtè a ta dwe suiv etap sa yo:

• Etap 1: Konekte sou kont anliy ou an.
• Etap 2: Nan tèt paj entènèt la, chwazi "Kont Mwen (My Account)" nan meni dewoulan an epi chwazi "bwat resepsyon (Inbox)".
• Etap 3: Klike sou bouton "Nouvo Mesaj".
• Etap 4: Pou sijè a, chwazi "Lòt (Other)" nan meni ki dewoule a, epi pou nimewo resi dosye ou a, chwazi nimewo resi ou a pou Fòm I-134A, Demann sou Entènèt pou ou ka vin yon Sipòtè ak Deklarasyon Sipò Finansye.
• Etap 5: Nan pati pou ekri mesaj la, ekri "CHNV Child Reunification (Reyinifikasyon pou Timoun KANV)" epi fè konnen se nan non yon timoun ki poko gen 18 lane ou kontakte USCIS ki kalifye nan kad pwosesis pou Kiben, Ayisyen, Nikaragweyen oswa Venezyelyen epi ki gen paran li oswa responsab legal ki kapab soti ak rantre Etazini pou al chèche timoun nan konsa timoun nan ap kapab benefisye pwosesis ki pou Kiben, Ayisyen, Nikaragweyen oswa Venezyelyen. Anplis, sipòtè a ta dwe ajoute dokiman prèv sa sou kont anliy li an:
  • Prèv ki montre li se paran oswa responsab legal timoun nan. (Pami prèv yo kapab gen sètifika nesans timoun nan, ak dokiman idantite pou paran oswa responsab legal la. An jeneral, prèv responsab legal la egzije pou gen yon pwosesis jiridik oswa administratif ki fèt ki enplike tribinal oswa yon lòt antite yo rekonèt nan gouvènman an. Yon pwokirasyon oswa yon deklarasyon alekri oswa yon notè siyen pa reprezante yon angajman ofisyèl yo rekonèt).
  • Dokiman oswa otorizasyon ki pou pwouve paran oswa responsab legal la kapab re-antre Ozetazini. Gen dokiman oswa otorizasyon pou re-antre Ozetazini, ki kapab prèv sitwayènte Ameriken, kat rezidans, oswa yon otorizasyon tanporè pou rete Ozetani ki avanse (Fòm I-131, Aplikasyon pou Dokiman Vwayaj, Dokiman libète Pwovizwa, ak Dosye Arive/Depa).
  • Yon deklarasyon ki siyen ki di paran oswa responsab legal la ap akonpaye timoun nan Ozetazini ak ba li swen ak siveyans fizik le li rive Ozetazini.

Sipòtè ki abite Etazini a pral kòmanse avèk demann lan sou entènèt nan non benefisyè ki deziyen an, l ap fè sa pandan li soumèt Fòm I-134A bay USCIS pou chak benefisyè, li gen ladan l timoun ki minè. Sipòtè yo kapab moun ki ranpli demann lan yon fason endepandan, ki ranpli l avèk lòt moun, oswa ki ranpli l nan non òganizasyon, biznis, oswa lòt antite. Ou p ap peye okenn frè pou ranpli Fòm I-134A. Gouvènman Etazini a pral kontwole sipòtè a pou pwoteje l kont eksplwatasyon ak abi, epi pou asire li kapab sipòte finansyèman benefisyè li dakò pou sipòte a.

An jeneral, pou sèvi kòm yon sipòtè, moun nan oswa moun ki reprezante antite a dwe:

• Yon sitwayen Ameriken, yon moun ki soti nan peyi a, oswa yon rezidan pèmanan legal; moun nan genyen yon estati legal Etazini tankou Estati Pwoteksyon Tanporè oswa azil; oswa libète sou kondisyon oswa li se benefisyè yon aksyon difere, oswa li benefisye yon entèvansyon ki te anpeche Depa Fòse Difere (DED);
• Pase ankèt sekirite ak antesedan, tankou pou sekirite piblik, sekirite nasyonal, komès moun, ak pwoblèm eksplwatasyon; epi
• Montre kantite resous finansye l genyen an sifi pou akeyi, nouri, epi sipòte moun li dakò pou sipòte a pandan peryòd libète sou kondisyon an.

Sipòtè ki ranpli Fòm I-134A nan non benefisyè a nan kad pwosesis sa yo dwe montre l dispoze epi li kapab resevwa, nouri, epi sipòte benefisyè li mete nan Fòm I-134A pou valè tan yo ba l libète sou kondisyon an. Men kèk egzanp sipò pou benefisyè sipòtè yo dwe sonje lè y ap konsidere kapasite pou reponn ak angajman sa a:

• Resevwa benefisyè a depi lè l rive Etazini a epi mennen l nan lojman inisyal li;
• Asire w benefisyè a gen yon lojman ki san danje epi ki apwopriye pou valè tan libète sou kondisyon an ak premye pwodui nesesite yo;
• Lè sa apwopriye, ede benefisyè a ranpli papye ki nesesè tankou otorizasyon pou travay, kat Sekirite Sosyal, ak pou sèvis li ka kalifye;
• Asire w benefisyè a jwenn swen sante ak medikal pandan tan li genyen libète sou kondisyon an; epi
• Lè sa apwopriye, ede benefisyè a pou l gen aksè ak edikasyon, aprann anglè, jwenn yon travay, epi enskri timoun yo nan lekòl.

Sipòtè yo dwe mete non benefisyè a nan Fòm I-134A a. Sipòtè yo pa dwe ranpli Fòm I-134A a nan non yon benefisyè san li pa mete non benefisyè a. Yon sipòtè ka dakò pou li sipòte plis pase yon (1) benefisyè, tankou diferan manm nan yon gwoup fanmi, men li dwe depoze yon Fòm I-134A apa pou chak benefisyè.

Sipòtè yo dwe ranpli yon Fòm I-134A apa pou chak benefisyè, menm pou timoun ki minè yo. Plizyè sipòtè ka mete tèt yo ansanm pou sipòte yon benefisyè. Nan ka sa a, sipòtè a ta dwe ranpli yon Fòm I-134A epi mete prèv sipò anplis ki demontre idantite, ak resous l ap bay yo, sipòtè li genyen anplis yo, epi mete yon deklarasyon ki eksplike entansyon yo genyen pou pataje responsablite pou sipòte benefisyè a. N ap evalye yon fason kolektif sipòtè yo genyen pou sipòte yon benefisyè.

Òganizasyon, konpayi, ak lòt antite yo kapab jwe yon wòl enpòtan nan bay sipò pou benefisyè yo vini atravè pwosesis sa a. Menm si moun nan oblije ranpli epi siyen Fòm I-134A a, li ka fè sa nan asosyasyon ak oswa sou non yon òganizasyon, yon konpayi, oswa yon lòt antite ki pral bay benefisyè a kèk oswa tout sipò ki nesesè yo. Sipòtè endividyèl ki ranpli ak yon òganizasyon oswa sou non yon òganizasyon, konpayi oswa lòt konpayi ta dwe soumèt prèv angajman antite a pou sipòte benefisyè a lè yo ranpli Fòm I-134A. Yo ka demontre sa a atravè yon lèt angajman oswa ak lòt dokiman yon ajan bay oswa yon lòt reprezantan ki gen otorizasyon nan òganizasyon an, nan konpayi a, oswa lòt antite ki dekri sipò lajan oswa lòt kalite sipò (tankou lojman, pwodui premye nesesite, transpò, elatriye) konpayi a pral bay benefisyè ki konsène a. Moun k ap ranpli ansanm ak yon òganizasyon, konpayi, oswa lòt antite pa bezwen soumèt enfòmasyon sou finans pèsonèl yo, si nivo sipò antite a montre ase pou sipòte benefisyè a.

Òganizasyon ki pa fè pati gouvènman an ka ede potansyèl sipòtè ak benefisyè yo pou prepare pou pwosesis sa a. Nou mete anba a de (2) òganizasyon ki espesyalize nan bay piblik la enfòmasyon sou fason pou yo akeyi moun ki fenk vini ak resous pou sipòte patisipasyon yo nan pwosesis sa yo.

• Welcome.us bay enfòmasyon sou fason pou akeyi ak sipòte moun ki fenk vini yo.
• Sant Esponnsò Kominotè (Community Sponsorship Hub) etabli Pwogram pou Gwoup Esponnsò (Sponsor Circle Program), ki kapab bay resous ak rekòmandasyon k ap kontinye pou sipòtè yo.

Nou bay enfòmasyon sa yo nan objektif pou enfòme w sèlman. DHS pa pran responsabilite pou antite sa yo. Lè nou itilize antite sa yo nan plas lòt antite, li pa bay yon moun ki gen libète sou kondisyon okenn avantaj nan desizyon k ap pran pou demann li a.

Benefisyè a pa kapab aplike dirèkteman pou pwosesis sa yo. Se yon sipòtè nan Etazini ki dwe ranpli epi depoze Fòm I-134A la an premye nan USCIS nan non benefisyè a, epi ajoute enfòmasyon sou li ak fason pou kontakte l, tankou yon adrès imèl. Si nou konsidere Fòm I-134A la ase, dapre desizyon pa nou, n ap voye enfòmasyon benefisyè a nan pwochen etap pwosesis la pou yo kapab egzaminen l pou otorizasyon vwayaj nan Etazini ak konsiderasyon pou libète sou kondisyon nan yon ayewopò pou rantre.

Depi benefisyè yo resevwa otorizasyon vwayaj la, yo dwe aranje yo pou vwayaje dirèkteman nan destinasyon final yo a ki se Etazini. Lè yo rive nan pò antre enteryè a, CBP ap enspekte moun nan epi l ap mande pou yo soumèt enfòmasyon anplis, li gen ladan l anprent, pou yo kapab fè plis ankèt byometrik, epi apresa y ap konsidere dapre yo deside pou bay yon libète sou kondisyon. Nou p ap konsidere moun k ap eseye rantre Etazini apati yon pòt rantre ki atè pou libète sou kondisyon atravè pwosesis sa a, epi jeneralman nou pa kite yo rantre.

Men kèk etap enpòtan nan pwosesis sa yo:

Etap 1: Sipò Finansye

• Yon sipòtè k ap viv Etazini ap soumèt Fòm I-134A, l ap fè Demann sou Entènèt pou ou ka vin yon Sipòtè ak Deklarasyon pou Sipò Finansye, avèk USCIS atravè pòtay myUSCIS ki sou entènèt pou kòmanse pwosesis la. Fòm I-134A la idantifye epi kolekte enfòmasyon alafwa sou sipòtè a ak benefisyè a. Sipòtè a dwe ranpli yon Fòm I-134A apa pou chak benefisyè li ap sipòte, li gen ladan l manm fanmi pwòch ak timoun ki minè.
• USCIS pral kontwole sipòtè a pou asire li kapab sipòte finansyèman benefisyè li dakò pou sipòte a, epi pwoteje l kont eksplwatasyon ak abi. USCIS, selon sa nou deside, dwe kontwole epi konfime sipòte yo anvan l kontinye nan pwosesis la.

Etap 2: Soumèt Enfòmasyon Byografik

• Si USCIS konfime yon sipòtè, benefisyè li mete a ap resevwa yon imèl USCIS voye avèk eksplikasyon sou fason pou kreye yon kont USCIS sou entènèt ak lòt etap k ap vini yo. Benefisyè a dwe konfime enfòmasyon byografik li yo nan myUSCIS, epi rekonèt li reponn ak kondisyon kalifikasyon yo.
• Nan kad konfimasyon pou kalifikasyon sou kont sou entènèt yo a, moun k ap mande otorizasyon pou li vwayaje Etazini a dwe konfime li reponn ak egzijans sante piblik, li gen ladan kèk egzijans sou vaksinasyon.

Etap 3: Soumèt Demann lan sou Aplikasyon Mobil CBP One

• Apre moun nan fin konfime enfòmasyon byografik sou kont sou entènèt li a, epi ranpli atestasyon kalifikasyon ki obligatwa yo, benefisyè a ap resevwa eksplikasyon atravè myUSCIS sou fason pou gen aksè ak Aplikasyon mobil CBP One)  (PDF, 771.55 KB). Benefisyè a dwe mete enfòmasyon byografik li nan CBP One epi bay yon foto.

Etap 4: Otorizasyon Vwayaj ki bay Alavans pou Etazini

• Lè w fin konplete Etap 3 a, benefisyè a ap resevwa yon avi sou kont sou entènèt li a k ap konfime si CBP ap bay, selon sa li deside, otorizasyon vwayaj ki bay alavans pou Etazini pou mande yon libète sou kondisyon selon sa yo deside, sou yon baz dosye pa dosye.
• Si l apwouve, otorizasyon sa a valid pou 90 jou. Se benefisyè a ki responsab pou òganize pwòp vwayaj li atravè avyon pou Etazini. Apwobasyon pou vwayaj ki bay alavans lan pou vwayaje pa garanti ou ap rantre oswa ou ap jwenn libète sou kondisyon lè w Etazini nan yon pò rantre Etazini. Libète sou kondisyon se yon desizyon CBP pran nan pò antre a, li pran l sou baz sa li jwenn pou jistifye libète sou kondisyon an ki dwe fèt pou rezon imanitè ijan, oswa pou avantaj piblik enpòtan.

Etap 5: Mande Libète sou Kondisyon nan yon Pò Rantre

• Lè yon benefisyè rive nan yon pò rantre, CBP ap enspekte l, epi l ap konsidere pou li bay selon sa li deside libète sou kondisyon an sou yon baz dosye pa dosye.
• Nan kad enspeksyon an, benefisyè a ap sibi verifikasyon ak kontwòl anplis, li gen ladan l kontwòl byometrik anprent yo jan pwosesis enspeksyon CBP a mande pou fè sa. Moun yo detèmine ki reprezante yon menas pou sekirite nasyonal oswa sekirite piblik la, oswa ki pa jistifye libète sou kondisyon selon sa yo deside apre enspeksyon an, pral suiv yon pwosesis apwopriye, epi yo ka voye yo nan Imigrasyon ak Dwàn Etazini (Immigration and Customs Enforcement, ICE)

Etap 6: Libète sou Kondisyon

• Jeneralman, moun ki benefisye yon libète sou kondisyon nan kad pwosesis sa yo nou libere yo Etazini pou yon peryòd ki rive jiska de (2) lane, pou sa fèt gen egzijans sou sante ak kontwòl ki aplikab, epi moun nan ap kapab aplike pou yon otorizasyon travay selon règleman ki egziste yo.

Moun ki benefisye yon libète sou kondisyon ka fè demann yon otorizasyon pou travay apati USCIS pandan y ap depoze yon Fòm I-765, Aplikasyon pou Otorizasyon pou Travay, swa sou entènèt oswa pa lapòs.

Aprè sipòtè a depoze Fòm I-134A nan USCIS, n ap egzaminen fòm nan ak prèv pou sipòte li yo pou asire nou sipòtè a gen ase resous finansye pou sipòte benefisyè a pou valè tan l ap gen peryòd libète sou kondisyon an, epi n ap verifye antesedan sipòtè a. Nou pral detèmine si Fòm I-134A ase, epi nou ka fè demann prèv anplis pou pran desizyon nou an. Si nou apwouve l, benefisyè yo ap resevwa yon imèl USCIS voye avèk eksplikasyon sou fason pou kreye yon kont USCIS sou entènèt ak lòt etap k ap vini yo. Moun yo dwe verifye imèl yo, li gen ladan l espam ak kontni endezirab, pou mesaj enpòtan USCIS voye.

Si Fòm I-134A a Ase

Si nou konfime selon sa nou deside, Fòm I-134A ase, benefisyè a ap resevwa yon imèl USCIS voye avèk eksplikasyon sou fason pou kreye yon kont USCIS sou entènèt ak lòt etap k ap vini yo. Benefisyè a dwe konfime enfòmasyon byografik li yo nan myUSCIS, epi rekonèt li reponn ak tout kondisyon yo tankou:

• Yon atestasyon ki rekonèt
  • ou pa yon rezidan pèmanan oswa ou pa gen doub nasyonalite nan okenn lòt peyi, epi kounye a ou pa gen estati refijye nan okenn peyi, sòf si DHS aplike yon pwosesis pou libète sou kondisyon ki menm jan an pou moun ki soti nan peyi a; oswa
  • ou se mari oswa madanm, patnè ki nan inyon lib, oswa yon timoun ki pa marye epi ki poko gen 21 lane k ap vwayaje avèk yon moun kalifye ki soti nan peyi a;
• Yon atestasyon ki sètifye ou konprann egzijans ki gen nan relasyon fanmi pou timoun ki poko gen 18 lane; ak
• Yon atestasyon ki montre ou respekte egzijans pou pran vaksen yo, oswa ou kalifye pou yon eksepsyon anrapò ak egzijans vaksen pou lawoujòl, polyo, ak premye dòz vaksen COVID-19 Administrasyon pou Manje ak Medikaman Etazini an (Food and Drug Administration, FDA) apwouve oswa Lis Itilizasyon nan Ka Ijans (Emergency Use Listed, EUL) Òganizasyon Mondyal Lasante etabli.

Lè l fin rive Etazini, benefisyè a dwe rekonèt li te fè yon tès depistaj medikal pou tibèkiloz, li gen ladan l yon Tès Liberasyon Entèferon-Gamma (Interferon-Gamma Release, IGRA), nan delè 90 jou.

Jwenn plis enfòmasyon sou egzijans pou vaksen an sou apèsi pou paj atestasyon pou vaksen an.

Si Fòm I-134A a Pa Ase

Si nou pa kapab konfime Fòm I-134A a ase, nou pran desizyon an nèt. Benefisyè a ap resevwa yon imèl USCIS voye ki fè l konnen nou detèmine Fòm I-134A yo te ranpli nan non li a pa ase. Nou p ap konsidere benefisyè a pou libète sou kondisyon nan kad pwosesis libète sou kondisyon sa a si Fòm I-134A a pa ase. Sepandan, sipòtè a ka depoze yon nouvo Fòm I-134A nan non menm moun nan oswa pou yon lòt benefisyè, oswa yon lòt sipòtè ka depoze yon Fòm I-134A nan non benefisyè a.

Otorizasyon pou Vwayaje vin Ozetazini

Depi benefisyè a fin konfime enfòmasyon byografik li yo, epi li rekonèt li reponn ak tout egzijans yo, n ap avanse avèk dosye yo a. Benefisyè yo ap resevwa yon imèl ki eksplike fason pou yo verifye kont sou entènèt yo gen sou myUSCIS pou yo wè rezilta otorizasyon pou vwayaj yo a. Otorizasyon sa a valid pou 90 jou.

Si nou otorize benefisyè a pou li vwayaje Etazini, li dwe aranje epi peye pou pwòp vwayaj li. Benefisyè yo dwe planifye pou yo vwayaje pa avyon pou yo vini Etazini dirèkteman nan yon pò antre enteryè ak nan destinasyon final yo a.

Aprè ou (benefisyè a) jwenn libète sou kondisyon Etazini, ou kalifye pou aplike pou yon otorizasyon travay selon sa USCIS deside. Pou mande yon Dokiman Otorizasyon Travay (Employment Authorization Document, EAD), ou dwe soumèt Fòm I-765, Aplikasyon pou Otorizasyon Travay, lè ou sèvi avèk kòd kategori (c)(11) ansanm ak frè ki nesesè yo oswa mande yon egzansyon frè.

Pou depoze Fòm I-765 la sou entènèt, moun ki aplike ki kalifye yo ap gen aksè ak kont USCIS yo a sou entènèt nan my.uscis.gov.

Ou ka vizite paj Barèm Frè nou an pou w jwenn frè aplikasyon pou Fòm I-765 la.

Moun ki aplike ki fè demann yon egzanpsyon frè pou depoze Fòm I-765 oswa ki kalifye pou yon egzanpsyon frè dwe soumèt Fòm I-765 pa lapòs ansanm ak Fòm I-912, Demann Egzanpsyon Frè.

Mande yon Kat ak yon Nimewo Sekirite Sosyal

Nou ankouraje w pou aplike pou yon Nimewo Sekirite Sosyal (Social Security Number, SSN) pandan w ap itilize Fòm I-765, Aplikasyon pou Otorizasyon Travay, epi suiv eksplikasyon pou fòm nan. Si ou fè demann yon SSN nan Pati 2 (Atik 13.a-17.b) nan Fòm I-765, epi nou apwouve aplikasyon ou an, USCIS ap transmèt done sa yon fason elektwonik bay Administrasyon Sekirite Sosyal (Social Security Administration, SSA), epi SSA ap ba ou yon SSN epi l ap remèt ou yon kat Sekirite Sosyal. SSA ap voye kat Sekirite Sosyal ou a dirèkteman pa lapòs nan adrès ou bay nan Fòm I-765 la. Jeneralman se moun ki otorize pou travay Etazini yo bay nimewo Sekirite Sosyal. Yo itilize nimewo Sekirite Sosyal la pou rapòte salè w bay gouvènman an, epi detèmine kalifikasyon w pou avantaj Sekirite Sosyal.

Si ou pa fè demann yon SSN nan Fòm I-765 ou a, ou kapab aplike pou yon SSN apre ou resevwa EAD ou a nan men USCIS pandan w ap suiv eksplikasyon ki sou paj entènèt SSA a Kat ak Nimewo Sekirite Sosyal.

Mizajou nan Adrès

Si w ap viv Etazini pandan plis pase 30 jou ou dwe deklare adrès fizik ou nan Etazini. Si adrès ou chanje apre w fin rantre Etazini ou dwe siyale chanjman adrès nan delè 10 jou yo, swa:

• Nan itilize fòm chanjman adrès anliy nou an ; oswa
• Atravè kont anliy USCIS egzistan an (si w gen yon kont). Pou plis enfòmasyon sou kijan pou kreye yon kont anliy, vizite Kijan pou Kreye yon Kont USCIS Anliy la.

Metòd pou chanje adrès nou mete anwo a ap fè mizajou nan dosye a nan USCIS pou tout aplikasyon, petisyon, oswa demann ou genyen k ap tann, epi ou ajoute nimewo resi lè w ap ranpli Fòm Chanjman Adrès Anliy la. Li enpòtan pou ajoute nimewo resi a pou nenpòt dosye ou ap tann nan USCIS avèk demann chanjman adrès ou a, konsa nou kapab fè mizajou nan adrès ki asosye avèk dosye sa yo. N ap voye dokiman sekirize yo nan adrès ki sou dosye a. Ou kapab jwenn nimewo resi a sou avi resepsyon (Fòm I-797C, Avi Aksyon) nou te remèt aprè w te fin depoze demann oswa petisyon ou an. Nou voye avi resepsyon an nan adrès ki ekri sou aplikasyon oswa petisyon an.

Lè w Fini ak Libète sou Kondisyon ou an

Si w deja gen yon libète sou kondisyon nan Etazini, libète sou kondisyon ou an ap fini otomatikman si:

• Ou kite Etazini (san yon Dokiman Libète sou Kondisyon anvan ou vwayaje deyò Etazini); oswa
• Peryòd libète sou kondisyon ou a ekspire.

DHS ka deside kanpe libète sou kondisyon ou an selon sa li deside pou lòt rezon, tankou lè ou vyole nenpòt lwa nan Etazini. Nou atann w ap kite peyi a lè libète sou kondisyon ou a ekspire. Si ou rete Etazini aprè libète sou kondisyon ou a ekspire, otorite ki rankontre w yo ka refere w bay ICE pou pwosedi imigrasyon.

Kite Etazini

Si nou ba w otorizasyon pou w vwayaje, se yon sèl fwa w ap ka prezante l pou  w vwayaje Ozetazini pou w ka mande  yon libète sou kondisyon nan pò antre Ozetazini an. Apre ou fin jwenn libète sou kondisyon Ozetazini, si ou vle kite peyi Etazini epi retounen kòm yon moun ki gen libète sou kondisyon, ou dwe mande yon Dokiman Libète sou kondisyon davans gras ak Fòm I-131 an w ap gen pou w ranpli ki se, Aplikasyon pou Dokiman Vwayaj, Dokiman libète Pwovizwa, ak Dosye Arive/Depa, anvan ou vwayaje andeyò Etazini. Si w kite Ozetazini san w pa resevwa yon Dokiman Libète Sou Kondisyon Alavans, libète sou kondisyon w lan ap sispann valab lè w ale. Pou w  jwenn enfòmasyon sou fason pou w ka aplike pou yon Dokiman Libète Sou Kondisyon Alavans pandan w Ozetazini, tanpri gade paj Fòm I-131 an.

Pi bon fason pou kontakte nou depann sou kalite demann nan.

Estati Demann Dosye yo: Ou ka verifye estati Fòm I-134A ou an sou kont USCIS anliy oswa nan Estati Dosye Anliy. Tanpri konnen Sant Kontak USCIS la kapab bay sèlman menm enfòmasyon sou estati dosye w ki disponib sou kont USCIS anliy ou an.

Koreksyon: Jeneralman ou kapab korije yon Fòm I-134A nan kont USCIS anliy ou an oswa lè w voye yon mesaj sou kont USCIS anliy. Ale nan seksyon "Correcting a Submitted Form I-134A" (Koreksyon yon Fòm I-134A ki Soumèt) sou paj Kesyon Moun Poze Souvan sou Pwosesis pou Kiben, Ayisyen, Nikaragweyen ak Venezyelyen pou plis enfòmasyon.

Lòt Demann yo: Pou lòt demann, ale nan seksyon "Correcting a Submitted Form I-134A" (Koreksyon Fòm I-134A ki Soumèt) sou paj Kesyon Moun Poze Souvan sou Pwosesis pou Kiben, Ayisyen, Nikaragweyen ak Venezyelyen pou plis enfòmasyon.

Tanpri remake benefisyè yo pa gen obligasyon pou remèt kòb, ranbouse, travay, sèvi, oswa bay sipòtè a lòt konpansasyon paske li ranpli Fòm I-134A nan non l oswa paske li ba li yon sipò finansye pandan li Etazini a.

Aksè ak pwosesis yo gratis. Ni sipòtè a ni benefisyè a pa gen obligasyon pou peye gouvènman Etazini a yon frè pou Fòm I-134A. Fè atansyon ak tout magouy oswa potansyèl eksplwatasyon nenpòt moun k ap mande w lajan ki asosye ak Fòm I-134A, oswa pou patisipasyon w nan pwosesis sa yo.

DHS rekòmande pou suiv mezi sa yo pou evite entimidasyon:

• Evite moun k ap pwomèt ou pou "vin Etazini tousuit" si w peye gwo kantite lajan.
• Toujou kenbe paspò w ak lòt dokiman idantite w nan men w.
• Si w gen enkyetid konsènan moun ki ranpli Fòm I-134A nan non w, epi li pa yon òganizasyon oswa antite ki gen otorizasyon legal, oswa reprezantan legal, ale sou paj entènèt Magouy, Fwod, ak Move Konpòtman.

Rele Liy Asistans pou Komès Moun ki fonksyone 24 sou 24 nan 1-888-373-7888 oswa siyale yon ijans bay fòs lalwa pandan w ap rele 911. Viktim komès moun, menm si moun nan se yon sitwayen Etazini oswa li pa yon sitwayen, yo kalifye pou èd ak sèvis nan imigrasyon.

Gen plizyè fòm abi ak eksplwatasyon, li gen ladan l vyolans domestik, maryaj fòse, ak komès moun. Etazini, gen lwa ki ka ede w evite oswa chape ak sitiyasyon kote y ap abize w.

• Vyolans Domestik se yon modèl konpòtman nan yon relasyon kote moun nan itilize l pou genyen oswa kenbe pouvwa a sou yon patnè entim, paran, oswa timoun. Abi domestik la ka enplike menas oswa menas fizik, seksyèl, emosyonèl, finansyè, oswa sikolojik.
• Maryaj fòse si maryaj la fèt san konsantman youn (1) oswa toulède moun nan maryaj la. Konsantman vle di ou bay tout akò w, yon fason ki lib, epi ou enfòme sou akò pou marye avèk mari/madanm ki prevwa a, epi ou okouran sou moman maryaj la. Maryaj fòse a ka fèt lè manm fanmi a oswa lòt moun itilize abi fizik oswa emosyonèl, menas, ba ou fo enfòmasyon pou fòse w marye san konsantman w. Pou jwenn plis enfòmasyon sou maryaj fòse, tanpri ale sou paj entènèt Maryaj Fòse.
• Komès Moun enplike eksplwate yon moun pou fòse l fè sèks pou lajan oswa fòse l travay. Jeneralman pou yo konsidere komès moun nan, eksplwatasyon sa a dwe fèt lè yo fòse w, gen fwod, oswa yo fè w menas. Sepandan, si yo fòse yon moun ki poko gen 18 lane pou fè sèks pou lajan, yo konsidere l tankou trafik moun, menm si pa yo pa fòse l, pa gen fwod, oswa yo pa fè l menas.

Si ou te viv oswa ou gen laperèz pou maraj fòse, vyolans domestik, komès mouns, oswa lòt abi, tanpri kontakte resous anba a pou resevwa èd gratis nan lang ou a:

• Liy Asistans Nasyonal pou Vyolans Domestik: 800-799-7233, 800-787-3224 (TTY), www.ndvh.org
• Sant Nasyonal pou Timoun yo Pa Wè ak Timoun y ap Eksplwate: 800-843-5678, www.missingkids.com
• Sant Nasyonal pou Viktim Krim: 800-394-2255, 800-211-7996 (TTY), www.victimsofcrime.org
• Liy Asistans Nasyonal pou Komès Moun: 888-373-7888, Voye mesaj nan: 233733

Pou plis enfòmasyon ak resous adisyonèl konsènan vyolans ki baze sou jan, gade Bwochi sou Vyolans ki Baze sou Jan an.

• Nou pa vle ou vin yon viktim magouy nan imigrasyon. Si ou bezwen yon konsèy legal sou kesyon imigrasyon, asire w moun k ap ede ou a gen otorizasyon pou bay konsèy legal. Se sèlman yon avoka oswa yon reprezantan otorize k ap travay pou Òganizasyon Depatman Jistis rekonèt ki kapab ba ou konsèy legal. Ale sou paj Evite Magouy pou w jwenn enfòmasyon ak resous.

Kèk magouy ki komen pou ou siveye yo gen ladan:

• Moun ki ap itilize fo idantite gouvènman: Siveye moun ki ap fè tèt yo pase pou ofisyèl USCIS. USCIS ap kontakte w sèlman sou chèn ofisyèl gouvènman yo epi li pa pral kontakte w sou kont rezo sosyo ou (tankou Facebook, Twitter, LinkedIn, elt.).
• Òf pou sipò ki pa klè: Siveye moun ki ap eseye kontakte w sou entènèt la oswa sou kont rezo sosyo ou yo pou ofri w sipò oswa pou ba w yon sipòte ann echanj pou peye yo oswa lòt fòm rekonpans. Menm jan, siveye moun ki ap chèche gen enfòmasyon biyografik ou, tankou nimewo paspò w oswa dat nesans ou sou kont rezo sosyo ou ki ap ofri w pou ba w esponnsò pou otorizasyon pou antre Ozetazini Tanporèman. Sipòte yo dwe kapab bay benefisyè yo sipò finansye jiska 2 lane pandan dire otorizasyon an. Benefisyè yo pa gen obligasyon remèt, ranbouse, travay pou, sèvi, marye, oswa rekonpanse yon lòt jan sipòtè a kòm echanj paske li te ranpli Fòm I-134A a sou non ou oswa poutèt li te ba ou sipò finansye pandan w Ozetazini. Jwenn plis enfòmasyon sou sou abi ak eksplwatasyon ki ka fèt nan gid Konprann Dwa w (PDF).
• Magouy sou Sit Entènèt:Kèk sit entènèt deklare yo relye ak USCIS epi yo ofri direksyon etap pa etap pou ranpli yon aplikasyon USCIS oswa petisyon. Asire w enfòmasyon ou soti nan uscis.gov, dhs.gov oswa lye ak uscis.gov. Asire w adrès sit entènèt la fini ak .gov.
• Pèman nan telefòn oswa Imèl: USCIS pa p janm mande w transfere lajan bay yon moun. Nou pa aksepte Western Union, MoneyGram, PayPal oswa kat kado pou peye frè pou imigrasyon. Anplis, nou pa pral ja mande w pou peye frè pou yon moun nan telefòn oswa pa imèl.
• Notarios Públicos and unauthorized practitioners of immigration law: Ozetazini yon notario público pa otorize pou ba w okenn sèvis legal ki gen pou wè ak avantaj imigrasyon. Se sèlman yon avoka oswa yon reprezantan akredite ki ap travay pou yon òganizasyon Depatman Jistis Ameriken an rekonèt, ki kapab ba w konsèy jiridik. Pou plis enfòmasyon pou, jwenn sèvis legal, ale sou sit entènèt nou an.

• Resous Anplwa pou Moun ki Gen Estati Libète sou Kondisyon Etazini
• Fòm I-134A, Demann sou Entènèt pou vin yon Sipòtè ak Deklarasyon Sipò Finansye
• Kesyon Moun Poze Souvan Sou Pwosesis pou Kiben, Ayisyen, Nikaragweyen, ak Venezyelyen
• Processes for Cubans, Haitians, Nicaraguans, and Venezuelans Flyer  (PDF, 401.27 KB)
• Processes for Cubans, Haitians, Nicaraguans, and Venezuelans Flyer  (PDF, 335.05 KB) (Spanish)
• Processes for Cubans, Haitians, Nicaraguans, and Venezuelans Flyer  (PDF, 340.46 KB) (Kreyòl Ayisyen)